Óhætt er að segja að FRAMarinn og landsliðsmaðurinn Jón Erik Sigurðsson hafi byrjað skíðakeppnistímabilið af krafti um helgina. Á laugardag náði hann 2. sæti í svigi á alþjóðlegu FIS-móti í alpagreinum í Levi í Finnlandi.
Það var frábær árangur hjá Jóni Erik sem var með rásnúmer 12. Hann var með fimmta besta tímann eftir fyrri ferðina og vann sig upp í annað sætið með sterkri frammistöðu í þeirri seinni.
Samanlagður tími Jóns var 1:52,43 mínútur og varð hann aðeins 15 hundraðshlutum úr sekúndu á eftir sigurvegaranum, Erik Saravuo frá Finnlandi. Fyrir þennan árangur fékk hann 25,63 FIS-punkta sem styrkir stöðu hans á Ólympíulistanum.
En Jón Erik var ekki hættur heldur gerði hann enn betur í svigkeppninni í gær sunnudag og stóð uppi sem sigurvegari meðal þeirra 103 keppenda sem hófu keppni en 42 náðu að klára báðar ferðir sínar.
Jón Erik sem var með rásnúmer 2 í gær, náði þriðja besta tímanum í fyrri ferðinni og svo besta tímanum í seinni ferðinni þar sem hann skákaði hinum finnska sigurvegara laugardagsins. Jón Erik tryggði sér nauman sigur eftir spennandi baráttu við Saravuo sem var 0,07 sek á eftir honum.
Fyrir árangurinn fékk Jón Erik 23 FIS-punkta sem er hans besti punktaárangur á ferlinum og styrkir sömuleiðis stöðu hans á Ólympíulistanum. „Ég er ánægður með góða byrjun á vetrinum en það er nóg inni og við erum rétt að byrja,“ er haft eftir Jóni Erik á heimasíðu Skíðasambands Íslands.
Mynd og heimild Skíðasamband Íslands.