fbpx

Úrslitaleikur um sæti í 1. deild

Körfuknattleikslið Fram sem leikið hefur í 2. deild Íslandsmótsins í vetur leikur á föstudaginn til undanúrslita gegn Reyni frá Sandgerði. Liðið sem sigrar leikur svo til úrslita gegn sigurvegaranum úr viðureign Augnabliks og Leiknis og tryggir sér um leið sæti í 1. deild á næsta keppnistímabili.

Lið Fram hefur sýnt góð tilþrif í vetur og náð mörgum góðum úrslitum á sínu öðru ári í 2. deildinni. Lengi vel stefndi allt í að liðið kæmist ekki í úrslitakeppnina. Tveir góðir sigrar í lokaumferðunum og hagstæð úrslit annarra leikja gerðu það þó að verkum að Framarar náðu markmiði sínu og tryggðu sér sæti í úrslitakeppninni.

Í síðustu tveimur leikjum deildarinnar sigraði Fram annars vegar lið Reynis frá Sandgerði 74-69 í hörkuleik og hins vegar lið Álftaness 75-48. Í 8-liða úrslitum lagði Fram svo lið Mostra frá Stykkishólmi á útivelli 55-63. Lið Mostra var fram að viðureigninni við Framara ósigrað á þessu tímabili.

Það er óhætt að segja að lið Fram sé á mikilli siglingu um þessar mundir. Framarar eru því hvattir til að bruna beint úr Digranesinu að loknum handboltaleiknum, beinustu leið í íþróttahús Kennaraháskólans á föstudagskvöldið. Leikurinn hefst kl. 21:00 og er aðgangur ókeypis.

Share this post

Share on facebook
Share on twitter
Share on linkedin
Share on pinterest
Share on email
Karfa0
There are no products in the cart!
Halda áfram að versla
0