Fram-ÍR-201012d1-e1355434112635

FRAM vann ÍR og tryggði sér sæti í deildarbikarnum

FRAM vann í kvöld sætan sigur á ÍR í Austurbergi, 34-30, lyfti sér þar með upp í fjórða sæti N1-deildar karla í handknattleik og verður meðal þátttakenda í deildarbikarkeppni HSÍ seint í janúar.

ÍR-ingar hófu leikinn í kvöld af nokkrum krafti og komust í 5-1, en vel útfærð og hljómmikil leikhlésræða Einars þjálfara Jónssonar vakti FRAMARA hressilega til lífsins.  Þeir náðu undirtökunum í leiknum, jöfnuðu fljótlega metin og komust yfir, en áhlaup ÍR-inga undir lok fyrri hálfleiks tryggði þeim jafna stöðu í leikhléi, 15-15.
Jafnræði var með liðunum á upphafsmínútum síðari hálfleiks, allt þar til Björn Viðar Björnsson tók þá viðeigandi og mikilsmetnu ákvörðun að verja flest það sem á mark FRAMARA kom.  Mögnuð frammistaða hans lagði grunninn að sex marka forystu sem ÍR-ingar náðu að minnka niður í fjögur mörk áður en yfir lauk, 30-34.

Þetta er annar sigur FRAMARA í röð í N1-deild karla og þessi fjögur stig hafa lyft liðinu úr sjöunda sætinu upp í það fjórða.  Sigurinn í dag var afar dýrmætur, bæði upp á deildarbikarkeppnina að gera en ekki síður framhaldið í deildinni; ágæt staða í fjórða sæti er góður grunnur til að byggja á á nýju ári.

Sigurður Eggertsson og Jóhann Gunnar Einarsson voru markahæstur FRAMARA í kvöld með 8 mörk hvor, Þorri Björn Gunnarsson skoraði 5 mörk, Garðar Sigurjónsson og Róbert Aron Hostert skoruðu sín hvor 4 mörkin, Stefán Baldvin Stefánsson skoraði 3 mörk og Stefán Darri Þórsson skoraði 2 mörk.
Björn Viðar fór eins og áður segir mikinn á milli stanganna og varði 18 skot.  Magnús Gunnar Erlendsson varði 2 skot.
Sturla Ásgeirsson var langmarkahæstur í liði ÍR með 12 mörk.

Share this post

Share on facebook
Share on twitter
Share on linkedin
Share on pinterest
Share on email