FRAM – FH klukkan 19.30 á þriðjudag

Deildarbikarmeistarar FRAM taka á móti FH í N1-deild kvenna í handknattleik þriðjudaginn 8.janúar klukkan 19.30.  FRAM hefur fullt hús stiga eftir níu leiki í deildinni og deilir toppsætinu með Val, en FH situr hins vegar í sjötta sæti og er sex stigum á eftir toppliðunum tveimur.

FRAM hefur unnið alla níu leiki sína í deildinni á þessari leiktíð með nokkuð sannfærandi hætti og lagði t.a.m. FH í Kaplakrika seint í september 27-17.  Það var sextándi sigurleikur FRAM gegn FH í röð, níu þessara leikja hafa farið fram í Kaplakrika og sjö í FRAMhúsinu.  FH fékk síðast stig gegn FRAM þegar liðin gerðu jafntefli í DHL-deildinni sem þá var og hét í október 2006, en þá gerðu liðin jafntefli í Kaplakrika 23-23.  FH hefur ekki fengið stig í FRAMhúsinu síðan liðið hafði sigur þann 1.apríl þetta sama ár, 24-21.
FRAM hefur unnið býsna sannfærandi sigra gegn FH í FRAMhúsinu síðustu misserin; í febrúar í fyrra vann FRAM 35-15 og í febrúar í hitteðfyrra 40-18.

Lið FH hefur komið mörgum spekingnum á óvart með frammistöðu sinni í vetur.  FH-stúlkur hafa tapað fyrir fjórum af liðunum fimm sem eru fyrir ofan þær í deildinni; FRAM, Val, ÍBV og Stjörnunni, en hafa unnið öll liðin í neðri hlutanum og höfðu að auki dýrmætan sigur á HK í lok október.

Mætum í FRAMhúsið klukkan 19.30 á þriðjudag og hvetjum FRAM til sautjánda sigursins í röð gegn FH!

Staðan í N1-deild kvenna: