Valur-Fram-kv-deild3

Valur – FRAM klukkan 15 á laugardag!

FRAM heimsækir Val í uppgjöri toppliðanna í N1-deild kvenna klukkan 15 á laugardag.  Þessir fornu fjendur eru jafnir að stigum í efstu sætum deildarinnar, hafa báðir unnið alla tíu deildarleiki sína til þessa og ljóst að eitthvað verður undan að láta að Hlíðarenda.

FRAM og Valur hafa marga hildina háð í kvennahandboltanum á síðustu misserum og hafa skipt sælustundum systurlega á milli sín síðan í upphafi síðustu leiktíðar.  Liðin hafa mæst átta sinnum á rúmu ári; tvisvar í deildinni, fimm sinnum í úrslitakeppninni og tvisvar í úrslitum deildarbikarkeppninnar, Flugfélags Íslands-bikarsins.  FRAM hefur unnið fjóra þessara leikja og Valur fjóra.  FRAM vann heimaleikinn gegn Val í deildinni á síðustu leiktíð 26-21, vann tvo leiki í úrslitakeppninni, 28-23 að Hlíðarenda og 18-17 í FRAMhúsinu, og fagnaði sætum sigri í úrslitaleik deildarbikarkeppninnar í Laugardalshöll milli jóla og nýárs, 28-24.  FRAM hefur unnið tvo af þremur síðustu leikjum sínum gegn Val.

FRAM fagnaði síðast sigri í Vodafonehöllinni í fyrsta leik úrslitakeppni N1-deildarinnar á vormánuðum, 28-23.  Valur hefur hins vegar unnið fjóra deildarleiki í röð gegn FRAM; síðasti deildarsigur FRAM að Hlíðarenda vannst í mars 2010, 27-24.

Þess má til gamans geta að FRAM og Valur hafa ekki gert jafntefli í kvennahandboltanum síðan í nóvember 2010, en þá skildu þau jöfn, 21-21, að Hlíðarenda.  Leikar stóðu vissulega jafnir eftir venjulegan leiktíma í eftirminnilegum leik í úrslitakeppninni 2011, og reyndar var jafnt eftir tvær framlengingar sömuleiðis, en Valur tryggði sér sigur í vítakastskeppni og úrslitin eru því færð til bókar sem slík.

Stelpurnar okkar eru til alls líklegar á laugardaginn.  Það er gríðarlega mikilvægt að við mætum og hvetjum þær til dáða, styðjum þær til sigurs á erfiðum útivelli.  Sýnum stuðning okkar í verki!

Staðan í N1-deild kvenna (af hsi.is):

Nr. Félag Leik U J T Mörk Nett Stig
1. Valur 10 10 0 0 351:183 168 20
2. Fram 10 10 0 0 299:173 126 20
3. ÍBV 11 8 1 2 288:240 48 17
4. HK 11 7 0 4 279:281 -2 14
5. Stjarnan 11 6 0 5 291:266 25 12
6. FH 11 6 0 5 263:280 -17 12
7. Haukar 10 4 0 6 222:254 -32 8
8. Grótta 11 3 1 7 228:259 -31 7
9. Selfoss 11 2 0 9 226:279 -53 4
10. Fylkir 11 1 0 10 193:319 -126 2
11. Afturelding 11 1 0 10 198:304 -106 2

Share this post

Share on facebook
Share on twitter
Share on linkedin
Share on pinterest
Share on email