Stúlkurnar í kvennaliði FRAM í knattspyrnu leika annan leik sinn á Reykjavíkurmótinu þegar þær mæta stöllum sínum úr Fylki klukkan 18 á sunnudag. Hið unga og efnilega lið FRAM ræðst ekki á garainn þar sem hann er lægstur á Reykjavíkurmótinu, fimm af andstæðingunum sex sem þar er att kappi við leika í Pepsi-deildinni og Fylkir er einmitt einn þeirra.
FRAM spólaði sig eftirminnilega í gegnum B-riðil 1.deildarinnar á síðustu leiktíð, vann þrettán af fjórtán leikjum sínum, skoraði 59 mörk og fékk á sig 13. FRAM hlaut tólf stigum meira en HK/Víkingur sem varð í öðru sæti riðilsins. Stúlkurnar náðu hins vegar ekki að fylgja þessari glæsilegu frammistöðu eftir í úrslitakeppninni, lutu þar í gras gegn grönnum sínum í Þrótti, sem ásamt HK/Víkingi tryggðu sér sæti í Pepsi-deildinni í sumar.
FRAMstúlkur töpuðu gegn Val í fyrsta leik sínum á Reykjavíkurmótinu, en mæta nú Fylki, sem varð í níunda sæti Pepsi-deildarinnar á síðustu leiktíð. Flautað verður til leiks í Egilshöllinni klukkan 18 á sunnudag, eins og áður segir.