SB

FRAM sækir Gróttu heim á laugardag

Fram-Valur-sbFRAM heimsækir Gróttu í N1-deild kvenna í handknattleik klukkan 15.30 á laugardag.  FRAM situr í öðru sæti deildarinnar, tveimur stigum á eftir toppliði Vals, en Grótta situr hins vegar í sjöunda sæti og hefur unnið tvo af þremur síðustu leikjum sínum.

Sagan er afar hliðholl FRAM þegar litið er á viðureignir gegn Gróttu undanfarin ár.  FRAM hefur unnið tíu síðustu leiki sína gegn Seltirningum, sex í FRAMhúsinu og fjóra í Hertz-höllinni.  Síðustu fimm leiki liðanna hefur FRAM unnið með nokkuð sannfærandi hætti, vann t.a.m. fyrri leikinn á þessari leiktíð með ellefu marka mun, 29-18, en fjórar af viðureignum liðanna á árunum 2008 og 2009 voru öllu jafnari.  Grótta nældi síðast í stig gegn FRAM í október 2007, en þá skildu liðin jöfn á Seltjarnarnesi, 21-21.
Grótta fagnaði síðast sigri gegn FRAM í DHL-deildinni sem þá var og hét í mars 2007, hafði þá betur í FRAMhúsinu 27-16.  Grótta vann alla þrjá leiki sína gegn FRAM á þessari leiktíð og leikurinn sem fram fór í Hertz-höllinni í nóvember 2006 er síðasti tapleikur FRAM í því fróma húsi.  Grótta vann 25-19, þar sem Natasa Damiljanovic skoraði sjöt mörk fyrir Gróttu, en Hekla Daðadóttir og Ásta Birna Gunnarsdóttir skoruðu sex mörk hvor fyrir FRAM.

FRAM situr eins og áður segir í öðru sæti N1-deildar kvenna, hefur unnið þrettán af fimmtán leikjum sínum en tapað í tvígang fyrir Val.  FRAM hefur unnið þrjá af fimm síðustu leikjum sínum, leikirnir gegn Val fóru báðir fram í janúar.  Grótta situr í sjöunda sæti, hefur unnið sex leiki, gert eitt jafntefli og tapað átta leikjum.  Grótta hefur unnið tvo leiki í röð, gegn Haukum og Stjörnunni, og þrjá af síðustu fimm, rétt eins og FRAM.  Tapleikirnir tveir eru gegn ÍBV og Val.

Staðan í N1-deild kvenna (af hsi.is):

Nr. Félag Leik U J T Mörk Nett Stig
1. Valur 15 14 0 1 491:309 182 28
2. Fram 15 13 0 2 444:290 154 26
3. ÍBV 14 9 1 4 368:309 59 19
4. Stjarnan 15 9 0 6 405:356 49 18
5. FH 14 9 0 5 353:350 3 18
6. HK 14 8 1 5 345:351 -6 17
7. Grótta 15 6 1 8 343:341 2 13
8. Haukar 14 4 0 10 318:372 -54 8
9. Selfoss 14 3 0 11 291:355 -64 6
10. Afturelding 15 2 1 12 281:411 -130 5
11. Fylkir 15 1 0 14 255:450 -195 2

Share this post

Share on facebook
Share on twitter
Share on linkedin
Share on pinterest
Share on email