FRAM, sem situr í öðru sæti N1-deildar kvenna í handknattleik og er tveimur stigum á eftir toppliði Vals, heimsækir í kvöld Aftureldngu í Mosfellsbæ, liðið sem situr í næstneðsta sæti deildarinnar. Flautað verður til leiks að Varmá klukkan 19.30.
Fyrirfram verður að telja harla líklegt að FRAMstúlkur sæki tvö stig í Mosfellsbæinn í kvöld, Afturelding er 28 stigum á eftir FRAM í deildinni og hefur ekki sótt gull í greipar liðanna í efri hlutanum. Afturelding hefur hlotið 5 stig í átján leikjum á þessari leiktíð og stigin fimm hefur liðið öll aflað sér á heimavelli eftir áramót. Mosfellsku meyjarnar hafa unnið stöllur sínar frá Selfossi með eins marks mun og Fylkisstúlkur með tveggja marka mun og gerðu jafntefil við HK. FRAM situr hins vegar í öðru sæti með 32 stig, hefur unnið öll liðin í deildinni nema Val.
FRAM vann fyrri viðureign þessara liða í nóvember í FRAMhúsinu með 33 mörkum gegn 19. Sunna Jónsdóttir skoraði 8 mörk í þeim leik og Stella Sigurðardóttir skoraði 6 mörk. Afturelding leikur nú í N1-deildinni, eða efstu deild, að nýju eftir nokkra fjarveru. Liðin hafa aðeins mæst þrisvar á síðustu fjórtán árum; FRAM vann báða leiki sína gegn Aftureldingu keppnistímabilið 1999-2000 með nokkuð sannfærandi hætti. Þá voru atkvæðamestar í liði FRAM kempur á borð við Marinu Zouevu, Söru Smart, Svanhildi Þengilsdóttur og Björk Tómasdóttur.
Staðan í N1-deild kvenna (af hsi.is):
|