FRAM tekur á móti ÍR í lokaumferð N1-deildar karla í handknattleik í kvöld og þessi síðasti heimaleikur FRAM í deildinni er gestunum úr Breiðholti býsna mikilvægur. ÍR berst um fjórða sæti deildarinnar, og þar með sæti í úrslitakeppninni, við HK og má illa við því að misstíga sig. ÍR hefur tveggja stiga forystu á HK fyrir þessa lokaumferð og nægir því stig í FRAMhúsinu í kvöld, en tap hjá ÍR og sigur HK gegn Akureyri á heimavelli myndi lyfta Kópavogsliðinu upp í fjórða sætið. HK stendur betur í innbyrðisviðureignum sínum gegn ÍR á þessari leiktíð, hefur unnið tvo leiki og ÍR einn.
FRAM situr sem fastast í þriðja sæti N1-deildarinnar, úrslit leikjanna í kvöld breyta engu þar um, og liðið getur því nálgast leikinn gegn ÍR án allrar pressu, en þó af alkunnri fagmennsku.
FRAM vann tvo fyrri leiki sína gegn ÍR á þessari leiktíð, 34-27 í FRAMhúsinu í október og 34-30 í Austurbergi í desember. FRAM hefur reyndar unnið sjö deildarleiki í röð gegn ÍR og fara þar aftur til mars 2004 til að finna síðasta sigurleik ÍR gegn FRAM. Þá höfðu Breiðhyltingar betur á heimavelli í DHL-deildinni sem þá var og hét, 36-33, en mánuði fyrr höfðu þeir fagnað sigri í FRAMhúsinu, 32-27. Það er síðasti sigur ÍR í þessu fróma húsi.
Staðan í N1-deild karla (af hsi.is):
|
|
