Fram-Stjarnan-SJ2

FRAM – ÍBV klukkan 18.30 í kvöld

Fram-Stjarnan-SJFRAM og ÍBV mætast í þriðja leik undanúrslita N1-deildar kvenna í handknattleik í FRAMhúsinu klukkan 18.30 í kvöld. Sérstök athygli er vakin á breyttum leiktíma, en leikurinn var upphaflega settur á kl. 19.30. Boðið verður upp á sérlega gómsætar flatbökur fyrir leik og í hálfleik í kvöld og vonir standa til þess að stuðningsmenn FRAM yfirgefi húsið bæði saddir og sáttir í leikslok.

FRAM hefur unnið báða leiki liðanna til þessa og með sigri í kvöld tryggja þær bláklæddu sér sæti í úrslitarimmunni um Íslandsmeistaratitilinn.  Fyrsta leikinn í FRAMhúsinu vann FRAM með eins marks mun, 25-24, og annan leikinn í Eyjum með tíu marka mun, 28-18.  Frammistaðan í þeim leik gefur fulla ástæðu til bjartsýni fyrir kvöldi.

Þegar tölfræði fyrstu tveggja leikja liðanna í undanúrslitunum er skoðuð má sjá að FRAMstúlkur dreifa markaskorun á milli sín af fagmennsku.  Stella skoraði 10 mörk (4/6) í leikjunum tveimur, lék lítið sem ekkert í síðari hálfleik fyrsta leiksins vegna meiðsla, og Birna (7/2) og Elísabet (6/3) skoruðu 9 mörk hvor.  Guðrún Þóra (1/5)og Sigurbjörg (2/4) skoruðu 6 mörk, Marthe 5 mörk (4/1) og Sunna (1/3) og Ásta Birna (0/4) 4 mörk hvor.
Drífa Þorvaldsdóttir (6/5) er markahæst í liði ÍBV með 11 mörk í leikjunum tveimur.  Simona Vintila (5/3) skoraði 8 mörk og Georgeta Grigore (5/2) skorarði 7 mörk, en hörkufín FRAMvörnin hélt hressilega aftur af þeim í leiknum í Eyjum.  Guðbjörg Guðmannsdóttir (4/2) kemur næst í markaskorun með 6 mörk og Ester Óskarsdóttir (3/2) skoraði 5 mörk.  Sandra Dís Sigurðardóttir skoraði 2 mörk, Rakel Hlynsdóttir og Ingibjörg Jónsdóttir 1 mark hvor og allar skoruðu þær mörkin sín í leiknum í Eyjum.

FRAMstúlkur standa á þröskuldinum og nú ríður á að styðja hraustlega við bakið á þeim.  Fjölmennum í FRAMhúsið í kvöld og tryggjum stelpunum okkar sæti í úrslitarimmu N1-deildarinnar.

Pizzur verða seldar í sjoppunni fyrir leik og í hálfleik.  Hvað er huggulegra en notaleg kvöldstund í Safamýrinni; flatbökur og góður handboltaleikur?

Share this post

Share on facebook
Share on twitter
Share on linkedin
Share on pinterest
Share on email