Fram-Stjarnan-ABGfors

Stjarnan spillti afmælisgleðinni í FRAMhúsinu

Fram-Stjarnan-ABGStjarnan hafði í dag tveggja marka sigur á FRAM, 21-19, í öðrum leik liðanna í úrsiltum N1-deildar kvenna í handknattleik og Garðbæingar hafa þar með tekið forystu í einvíginu, 2-1.  Stjarnan hafði forystu í hálfleik, 13-8, og stóðst síðbúið áhlaup FRAMstúlkna, sem heilt yfir voru langt frá sínu besta.

FRAMstúlkur hófu leikinn í dag af nokkrum krafti, komust í 3-1 og virtust nokkuð vel stemmdar.  Stjarnan jafnaði hins vegar metin í snarhasti, 4-4, og tók upp frá því frumkvæðið í leiknum.  Varnarleikur FRAM var nánast óþekkjanlegur og döpur færanýting virtist slá þær bláu út af laginu.  Það segir sína sögu að eftir ellefu mínútna leik voru þrjú vítaköst farin í súginn, auk tveggja dauðafæra sem alla jafna hefðu skilað mörkum.  Stjörnustúlkur (lesist Skúli Gunnsteinsson) virtust vera búnar að kortleggja FRAMliðið ágætlega, buðu upp á árangursríkar aðgerðir á báðum endum vallarins.  Fyrri hálfleik lauk í raun ekki nógu snemma, Stjarnan jók forskotið eftir því sem á leið og hafði fimm maka forystu eftir hálftíma leik, 13-8.
Fátt virtist benda til þess framan af leik að FRAM myndi ógna forystu Stjörnunnar að ráði, en breytingar sem gerðar voru á varnarleiknum í fyrri hálfleik fóru þó hægt og bítandi að skila betri árangri og upp úr miðjum síðari hálfleik jafnaðist leikurinn talsvert.  FRAM fékk mýmörg tækifæri til að höggva í forystuna og jafnvel jafna metin á kafla þar sem vörnin var sjálfri sér lík, en færanýtingin var ekki upp á marga fiska.  Spennustigið hækkaði talsvert þegar munurinn var orðinn eitt mark, 18-19, og þrjár mínútur eftir.  Fátið tók þá völdin og Stjarnan skoraði tvö mörk í röð, pakkaði leiknum inn og skreytti hann með borða.  Lokatölur urðu 21-19 fyrir Stjörnuna, sem þar með hefur tekið forystu í einvíginu 2-1 og getur tryggt sér Íslandsmeistaratitilinn með sigri á heimavelli sínum á föstudag.  Planið er hins vegar að það gerist ekki.
Stjarnan vann þennan leik á skynsemi og hörku, stúlkurnar úr Garðabæ voru grjótharðar og gengu eins og langt og ágætir dómarar leiksins leyfðu.  Þær náðu að slá taktinn að mestu leyti úr sóknarleik FRAM – og þetta er reyndar atriði sem FRAMstúlkur verða að laga.  Ef þær eru á réttu róli standa þær ágætlega í samanburði við Garðabæjarliðið og það er engin ástæða til annars en að stefna á – og treysta á – FRAMsigur á föstudag.  FRAMstúlkur vita það best sjálfar að þær voru fjarri sínu besta í dag og kvitta vonandi fyrir það í Garðabænum í næsta leik.

Mörk FRAM: Sunna Jónsdóttir 5, Stella Sigurðardóttir 5, Elísabet Gunnarsdóttir 4, Sigurbjörg Jóhannsdóttir 2, Ásta Birna Gunnarsdóttir 2, Guðrún Þóra Hálfdánsdóttir 1.
Varin skot: Hildur Gunnarsdóttir 3, Guðrún Bjartmarz 2.
Mörk Stjörnunnar: Hanna Guðrún Stefánsdóttir 7, Rakel Dögg Bragadóttir 7, Esther Ragnarsdóttir 5,Kristín Clausen 1, Jóna Margrét Ragnarsdóttir 1.
Varin skot: Sunneva Einarsdóttir 16.

Share this post

Share on facebook
Share on twitter
Share on linkedin
Share on pinterest
Share on email