Haukar höfðu í dag betur gegn FRAM, 27-24, í þriðja leik úrslitarimmu N1-deildar karla í handknattleik og komu þar með í veg fyrir að FRAMarar tryggðu sér Íslandsmeistaratitilinn í Schenkerhöllinni að Ásvöllum. Haukar höfðu sex marka forystu í hálfleik, 18-12, en FRAM hleypti spennu í leikinn þegar þeir jöfnuðu metin fimm mínútum fyrir leikslok.
Leikurinn í dag var sveiflukenndur í meira lagi og FRAMdrengjum tókst að brydda upp á bæði versta og besta sem þeir hafa upp á að bjóða. Eftir nokkuð jafnar upphafsmínútur tóku Haukar öll völd á vellinum, spiluðu hörkufína vörn og refsuðu fyrir minnstu mistök með urmul hraðaupphlaupsmarka og marka úr hornum, nokkru sem lítið hefur borið á í síðustu leikjum. Forystan jókst jafnt og þétt og tíminn virtist líða á hraða snigilsins. Þegar flautað var til hálfleks var munurinn sex mörk, 18-12, og fjöldi Haukamarkanna segir allt sem segja þarf um gang mála. Haukar skoruðu 20 mörk í fyrsta leiknum að Ásvöllum og 21 mark í venjulegum leiktíma í öðrum leiknum í FRAMhúsinu. Átján mörk í fyrri hálfleiknum í dag.
Fátt benti til þess á upphafsmínútum síðari hálfleiks að takturinn í leiknum væri að breytast, Haukarnir héldu FRÖMurum í hæfilegri fjarlægð og virtust hafa leikinn í hendi sér. Þá kom hins vegar kafli þar sem FRAMarar sýndu flestar sínar bestu hliðar, skelltu í lás í vörninni og skoruðu í kjölfarið mörk í öllum regnbogans litum. Staðan breyttist úr 21-15 í 22-21 á tíu mínútna kafla þar sem stemmningin var öll gestamegin og þegar fimm mínútur voru til leiksloka jafnaði Ólafur Magnússon metin með marki úr hraðaupphlaupi, 23-23. Haukar reyndist hins vegar sterkari á lokamínútunum, náðu þá aftur að refsa grimmilega fyrir minnstu mistök og fögnuðu að lokum þriggja marka sigri, 27-24.
FRAMarar hafa oft leikið betur en þeir gerðu í dag, síðari hluta fyrri hálfleiks og framan af þeim síðari voru þeir varla með í prógramminu og svöruðu engan veginn ágengum og ákveðnum leik Haukanna. Það snarbreyttist snemma í síðari hálfleik og frábæri kaflinn þar var næstum búinn að snarsnúa leiknum. Á þessum kafla voru FRAMarar sjálfum sér líkir og það er þetta FRAMlið sem þarf og mun mæta til leiks á mánudag. Þá fer fram fjórði leikurinn í þessu ágæta einvígi, hvar FRAM hefur forystu 2-1, og verður flautað til leiks í FRAMhúsinu klukkan 19.45.
Mörk FRAM: Róbert Aron Hostert 6, Sigurður Eggertsson 5, Stefán Baldvin Stefánsson 4, Ólafur Magnússon 3, Jóhann Gunnar Einarsson 3, Elías Bóasson 2, Garðar B. Sigurjónsson 1.
Varin skot: Magnús Gunnar Erlendsson 9, Björn Viðar Björnsson 1.
Mörk Hauka: Gylfi Gylfason 7, Freyr Brynjarsson 6, Tjörvi Þorgeirsson 6, Sigurbergur Sveinsson 4, Jón Þorbjörn Jóhannsson 2, Adam Haukur Baumruk 1, Árni Steinn Steinþórsson 1.
Varin skot: Aron Rafn Eðvarðsson 15.