FRAM mátti í kvöld sætta sig við tap gegn Haukum, 1-2, í A-riðli 1.deildar kvenna í knattspyrnu. Haukar, sem í kvöld léku fyrsta leik sinn í deildinni, skoruðu sigurmarkið í blálokin, en þetta er annar tapleikur FRAM í jafnmörgum leikjum.
Leikurinn á Schenkervellinum hófst með talsverðum látum og eftir tíu mínútna leik var búið að skora tvö mörk. Hildigunnur Ólafsdóttir kom heimastúlkum yfir á fimmtu mínútu og Dagmar Ýr Arnardóttir jafnaði metin fyrir FRAM fimm mínútum síðar. Staðan var 1-1 allt þar til ein mínúta var til leiksloka, en þá skoraði Tinna Líf Jörgensdóttir sigurmark Hauka, 2-1.