KristinnIngi

Sárgrætilegt tap gegn Stjörnunni | Færanýtingin dýrkeypt

KristinnIngiFRAM mátti í kvöld sætta sig við tap gegn Stjörnunni, 0-1, í fimmtu umferð Pepsideildar karla í knattspyrnu.  Robert Sandnes skoraði eina mark leiksins eftir rúmlega hálftíma leik, en miðað við gang mála og fjölda marktækifæra í leiknum verður varla annað sagt en að úrslitin verði færð til bókar sem ósanngjörn.

Fram 0-1 Stjarnan (0-1)
0-1  Robert Sandnes 34.mín.

Stjörnumenn hófu leikinn í kvöld af nokkrum krafti og áttu fyrstu marktækifærin, en leikur FRAMliðsins þéttist eftir því sem á leið og fékk nokkur ljómandi góð tækifæri til að skora.  Tvö marktækifæranna í fyrri hálfleik voru af þeirri gerðinni sem alla jafna gefa mörk, en fótboltaguðirnir brostu ekki við þeim bláu í kvöld.  Eina markið kom eftir rúmlega hálftíma leik og Robert Sandnes átti það í raun með glugga og hurðum.  Hann skeiðaði inn á teiginn en mætti þar tvíefldum Ólafi Erni, sem vann af honum boltann, Sandnes tvíefldist við mótlætið, vann boltann aftur og skoraði með þrumuskoti.
Stjörnumenn bökkuðu talsvert í síðari hálfleik, FRAMpiltar stýrðu umferðinni og fengu ljómandi færi á því að koma sér á blað.  Það var hins vegar nokk sama hvað reynt var, inn vildi boltinn ekki og því verður að kyngja þeim gallsúra bita að tapa þessum leik.

FRAMsveinar léku á köflum ljómandi vel í kvöld og voru þegar allt er talið sterkari aðilinn í leiknum.  Á stundum voru þeir þó einum of gjarnir á að slá hraðann svolítið úr aðgerðum sínum og naga sig væntanlega í handarbökin fyrir það að klára ekki færin sín.  Af þeim var gnógt.  Með sama áframhaldi fer að styttast í stigasöfnun, liðið spilar ágætlega og hlýtur að detta í það að nýta færin sem gefast.

Share this post

Share on facebook
Share on twitter
Share on linkedin
Share on pinterest
Share on email