SAMRÁÐ UM ÞRÓUN HVERFA Í REYKJAVIK
Íbúafundir verða haldnir í átta borgarhlutum Reykjavíkur á næstu vikum þar sem hafist verður handa við þróun hverfa borgarinnar. Hér er um nýbreytni í skipulagsmálum að ræða undir heitinu hverfisskipulag sem hvílir á markmiðum um heilsu, öryggi og vistvænt umhverfi borgarbúa sem sett eru í aðalskipulagi Reykjavíkur.
Hverfisskipulagið felst m.a. í því að rækta staðaranda hverfanna og þróa þau í átt að sjálfbærum einingum, með það að markmiði að bæta heilsu, öryggi og vellíðan íbúa.
Fundirnir verða haldnir núna í september og þar gefst íbúum tækifæri á að hafa áhrif strax í upphafi hverfisskipulagsvinnunnar.
Á fundunum verður m.a. leitast við að svara spurningum eins og: Hvar væri best að hafa verslun og þjónustu innan hverfisins? Hvar eru góð opin græn svæði og hver má bæta? Hvar er möguleiki á þéttingu byggðar? Hvernig er hægt að bæta göngu- og hjólaleiðir barna í skóla eða fullorðinna í vinnu? Hvernig er hægt að fá börn til að leika sér úti og hreyfa sig meira? Hvernig er hægt að efla staðaranda?
Í hverfisskipulagi verða settar almennar reglur um yfirbragð, þróun og varðveislu byggðarinnar. Öflugt samráð við íbúa og hagsmunaaðila verður einkenni á hverfisskipulaginu og Reykjavíkurborg hefur þegar ráðið ráðgjafateymi til að vinna 1.áfanga hverfisskipulags fyrir átta af tíu borgarhlutum í Reykjavík. Samráðið við íbúa verður á netinu, úti í hverfunum og á íbúa- og hagsmunaaðilafundum.
Íbúafundirnir verða haldnir í átta borgarhlutum Reykjavíkur á næstu vikum milli kl. 17-19:
Vesturbær: Hagaskóli 16.september
Hlíðar: Kjarvalsstaðir 17.september
Laugardalur: Laugardalshöll 18.september
Háaleiti-Bústaðir: Réttarholtsskóli 19.september
Breiðholt: Gerðuberg 23.september
Árbær: Fylkishöll – Fylkisvegi 6 24.september
Grafarholt-Úlfarsárdalur: Ingunnarskóli 25.september
Grafarvogur: Gufunesbær 26.september
Allir eru velkomnir, boðið verður upp á léttar veitingar og hugmyndahorn fyrir börn. Einnig er hægt að taka þátt á netinu í gegnum síðuna www.hverfisskipulag.is
