Hólmbert Aron Friðjónsson fyrrverandi leikmaður FRAM skrifaði í morgun undir 3 ára samning við skosku meistarana í Celtic. Hólmbert var kátur þegar fram.is heyrði í honum nokkrum mínútum eftir undriskrift samningsins í Glasgow. “Ég er hrikalega ánægður og stoltur að vera búinn að skrifa undir samning við Celtic og get ekki beðið eftir að byrja á fullu. Ég vil þakka Fram fyrir að gefa mér tækifæri til að taka skrefið upp í betri deild og bæta mig sem leikmaður“, sagði nýjasti atvinnumaður Íslendinga glaðbeittur.
Hólmbert Aron kom til FRAM í júlí 2011. Hann spilaði 50 leiki í deild og bikarkeppni með FRAM og skoraði í þeim 14 mörk, þar af komu 13 á síðasta sumri. FRAM þakkar Hólmberti afar ánægjulega samfylgd og félagið er stolt af því að eiga þátt í því ferli sem nú skilar sér í þriggja ára atvinnumannsamningi við stórveldið í Glasgow.
Til hamingju Hólmbert og gangi þér sem allra best á nýjum slóðum.