Handknattleiksdeild Fram hefur samið við Ástu Birnu Gunnarsdóttur og Steinunni Björnsdóttur til tveggja ára. Báðar hafa þær leikið stórt hlutverk með meistaraflokki kvenna á liðnum árum.
Ásta Birna Gunnarsdóttir
Ásta er fædd í október 1984. Hún hefur leikið með meistaraflokki FRAM frá því veturinn 2002 – 2003 og hefur leikið yfir 300 leiki með meistaraflokki FRAM. Hún hefur átt fast sæti í A landsliði HSÍ undanfarin ár og hefur leikið 82 landsleiki fyrir Íslands hönd.
Ásta varð fyrir því óhappi að slíta krossband í hné snemma í vetur og lék því lítið með FRAM á keppnistímabilinu. Hún er komin vel á veg í endurhæfingu og stefnir á að verða kominn á fulla ferð með FRAM þegar undirbúningur fyrir næsta vetur hefst í sumar.
Steinunn Björnsdóttir
Steinunn er fædd í mars 1991. Hún hefur leikið með meistaraflokki FRAM frá því veturinn 2009 – 2010. Steinunn hefur leikið um það bil 100 leiki með meistaraflokki FRAM. Hún hefur átt fast sæti í A landsliði HSÍ síðustu misseri og hefur leikið 14 landsleiki fyrir Ísland.
Steinunn meiddist síðastliðið haust í leik með landsliði Íslands og hefur ekki jafnað sig að fullu þó að hún hafi leikið síðustu leikina með FRAM nú í vor. Steinunn mun nota sumarið til að jafna sig á þessum meiðslum og kemur væntanlega sterk til leiks næsta haust.
Handknattleiksdeild FRAM