Það var glæsilegt fótboltaveður á Valbjarnarvelli í dag þegar við FRAMarar mættum Þrótti. Völlurinn mjög þokkalegur, blautur, sem gefur leiknum alltaf smá auka möguleika á einhverju skemmtilegu. Þróttarar sennilega mjög menningarlega sinnaðir því það var léleg mæting á völlinn.
Við byrjuðum leikinn í dag ekkert sérstaklega vel, gáfum færi á okkur og vorum klaufar varnarlega. Leikurinn var samt nokkuð jafn fyrstu 15 mín. leiksins. En á 15 mín. gerðum við gott mark þegar Maggi Lú sendi knöttinn í markið af stuttu færi eftir skalla frá Indriða. Góður skalli og fín afgreiðsla hjá Magga. Eftir markið var jafnræði með liðunum en á 24 mín fékk Atli Fannar dauðafæri sem hann hefði átt að nýta betur og koma okkur í góða stöðu en það heppnaðist ekki. Þróttarar náðu að jafna leikinn á 35 mín. þegar við gleymdum okkur varnarlega og Ingibergur var skilinn eftir aleinn. Við aðeins í vandræðum, en á 41 mín. gerðum við flott mark eftir aukaspyrnu frá Magga Lú en þá skallaði Sebastien í marki, ljómandi vel gert mark. Staðan í hálfleik 1-2. Við lékum fyrri hálfleikinn bara nokkuð vel gáfum ekki mikil færi á okkur, góð barátta í liðinu og útlitið gott.
Síðari hálfleikur var bara góður hjá okkur lengst af, við gáfum enginn færi á okkur og voru alltaf líklegir fram á við. Við fengum á okkur mark á 70 mín. eftir aukaspyrnu sem við áttu ekki að gefa, algjörlega óþarfa brot af okkar hálfu. Það var bullandi fjör í leiknum það sem eftir lifði leiks, bæði liðin sköpuðu færi og spenna í loftinu. Við vildum fá víti þegar Indriða var hrint í teignum og eins vildum við fá mark þegar Þróttarar björguðu á línu en finnskur dómari leiksins gaf okkur ekkert. Var algjör gunga þessi Finni og dæmdi sérkennilega þó hann hafi ekki verið beint slakur. Lokatölur í dag 2-2, kannski ásættanlegt en hefðum viljað meira, við hefðum alveg átt það skilið. Við spiluðum vel í dag og mun betur en í síðustu leikjum, mjög gott að fá Ingiberg aftur í vörnina, liðið var allt að spila betur. Vel gert drengir, þurfum að mæta með þetta hugafar í næsta leik sem er gegn Bolungarvík í Úlfarsárdalnum eftir slétta viku, sjáumst þá.
ÁFRAM FRAM