Stelpurnar okkar í hanboltanum léku í kvöld gríðarlega mikilvægan leik í Coca Cola bikarkeppni HSÍ, leikið var gegn ÍR í Austurbergi. Eins og áður sagði var mikið í húfi því sigur í leiknum tryggir farseðil í Laugardalshöllina í „Final four“ sem fer fram 8-10 mars.
Ljóst að við værum með sterkara lið en ÍR og ættum í raun að vinna þennan leik en bikarleikir eru alltaf sérstakir þar sem allt er í húfi í þessum eina leik.
Það varð raunin í þessum leik, ÍR lagði líf og sál í þennan leik og við áttum bara í vandræðum með að hrista þær af okkur, við ekki að spila vel og pínu kæruleysi í okkar liði. Leikurinn nokkuð jafn en við svo sem með frumkvæðið í leiknum. Staðan í hálfleik 12-16.
Ljóst að við yrðum að halda vel á spilunum í þeim síðari.
Við gerðum það ágætlega, byrjuðum síðari hálfleikinn sterkt og bættum við forskotið en ekkert meira en það. Við fórum einhver 6-8 mörk yfir og náðum að halda því til loka, lokatölur í kvöld 32-26.
Fátt um þennan leik að segja, við mættum liði sem var til í að berjast frá upphafi til enda og við kannski smá værukærar. Heiðrún átti fínan leik í markinu, Guðrún Þóra sýndi gamla takta og Karen mætti til leiks sem var ánægjulegt að sjá.
Við unnum, það er fyrir öllu og tryggir okkur sæti í undanúrslitum Coca Cola bikarsins Final Four í Laugardalshöll. Vel gert stelpur og enn eitt árið fáum við að fylgja ykkur í Höllina sem verður spennandi.
Næsti leikur er á heimavelli gegn Fjölni á föstudag kl. 18:30, sjáumst.
ÁFRAM FRAM