Portugal ferð mfl

Daginn FRAMARAR, allt gott að frétta héðan frá Portúgal

Allt gott að frétta héðan frá Portúgal.

Hér verður aðeins stiklað á stóru en dagskráin í suðrinu gerir löngum skrifum erfitt fyrir.

Líkt og aðra morgna byrjaði þriðjudagurinn á morgunmat 08.00 og æfingu í kjölfarið. Menn voru misþreyttir eftir leikinn gegn CSM Búkarest og því var æft út frá því.
Næstu andstæðingar okkar var liði AA Avanca, lið sem hafnaði í 5. sæti í portúgölsku deildinni í fyrra. Hitinn í höllinn var óbærilegur enda 34 gráður búnar að vera yfir daginn og engin loftkæling í húsinu. Portúgalarnir leiddu í hálfleik með 3-4 mörkum og síðan enduðu leikar í markatölunni 22 – 19 fyrir heimamönnum. Avanca er með hörku lið sem var alltaf skrefi á undan í leiknum. Það vantaði smá upp á neistann og ákefðina í fyrri hálfleik en við gerðum betur í seinni hálfleik. Gaman að segja frá því að Þorgeir Bjarki spilaði sínar fyrstu mínútur fyrir FRAM eftir erfið meiðsli og skoraði 2 mörk, gleðifréttir fyrir hann og félagið.

Í gær, miðvikudaginn, hélt ballið áfram. Eftir æfingu var komið að frítíma, sem menn nýttu við sundlaugarbakkann eða í verslunarleiðangri. Keppinautar dagsins voru að þessu sinni ISMAI frá Portúgal. Lið sem hafnaði í 8-9. sæti í efstu deild í fyrra. Nokkrir leikmenn fengu hvíld þar sem álagið hefur verið mikið. Leikurinn tapaðist 29 – 28.  Baráttan var hins vegar mjög góð og spiluðu allir leikmenn vel.

Eftir báða leikina hafa heimamenn boðið okkur út að borða, á veitingastað í næsta nágrenni við keppnishöllina. Viðmótið er frábært hjá fólkinu hér og hefur ferðin gengið vel fyrir sig. Portúgalarnir eru hrifnir af því að masa út í eitt á eigin tungumáli við okkur og við svörum á móti ,,No comprende”.

Næst á dagskrá:
Í dag, er frí dagur. Ætlunin er að fara niður að strönd og borða saman góðan mat. Næsti leikur er á móti stórliði FC Porto á laugardaginn í samnefndri borg.  Hendum jafnvel í einn pistill áður en yfir líkur.

Biðjum að heilsa heim.

Kv. ÞSÓ og leikmenn FRAM

Share this post

Share on facebook
Share on twitter
Share on linkedin
Share on pinterest
Share on email