valdi-gegn-grottu-vefur

Andleysi í Safamýri

Það var gul viðvörun vegna lægðar sem gekk yfir landið í dag. Viðvörunin við lægð leikmanna Fram í dag hefði þó mátt vera rauð og blikkandi.

Grótta kom í heimsókn í Safamýri og um var að ræða gríðarlega mikilvægan leik fyrir okkar menn. Það var ágætis stemmning í húsinu enda mikið undir og væntingar háar.

Leikurinn byrjaði mjög varnarsinnaður, mikill skjálfti virtist vera í leikmönnum beggja liða og mikið um mistök. Lítið var skorað í byrjun leiks og staðan 1-1 eftir 7 mínútur.

Um miðbik fyrri hálfleiks náðum við að róa okkar leik aðeins, gerðum færri mistök en Gróttumenn. Með því náðum við smá forskoti og tókum þannig frumkvæði í leiknum. Þannig héldum við út og staðan þegar gengið var til búningsklefa í hálfleik 10 – 7 fyrir okkar mönnum.

Vörnin var ágæt og Viktor að verja vel í rammanum en sóknarleikurinn ekki upp á marga fiska.

Undirritaður tölti bjartsýnn með framhaldið og fékk sér kaffi og litla sneið af vínarbrauði ánægður með forskotið í hálfleik.

Á undirritaðan runnu tvær grímur um leið og flautað var til leiks í seinni hálfleik og augljóst í hvað stefndi. Gróttumenn komust yfir 11-12 eftir 8 mínútur í seinni hálfleik.

Á meðan Grótta tók frumkvæði og voru skynsamir undir harðri stjórn hreppstjórans, Einars Jónssonar, voru okkar menn eins og þær ætluðu upp ártúnsbrekkuna í hlutlausum gír. Skotnýting okkar manna til skammar, vörnin götótt og Viktor kom engum vörnum við í rammanum.

Grótta jók smám saman forskotið í 4 mörk og héldu út leikinn. Lokatölur 20-24 Gróttu í vil.

Það voru of margir leikmenn í dag andlega fjarverandi, eiginlega bara allt liðið. Núna þurfa menn að berja sig saman í landsleikjahlénu, kafa djúpt og mæta með höfuð hátt og kassann út í næsta leik sem verður gegn Stjörnunni í Garðabæ sunnudaginn 4. nóvember kl. 19:30.

Ég veit við getum betur en það sem boðið var uppá í dag.

Áfram FRAM

Share this post

Share on facebook
Share on twitter
Share on linkedin
Share on pinterest
Share on email