Góður FRAM sigur á Þrótti

Það var þokkalega sumarlegt á Laugardalsvellinum í kvöld, völlurinn fallegur en hefur oft verið betri, eins og hann sé ósléttur og ekki búinn að ná sínu besta.  Það var ekki nógu góð mæting að þessu sinni og við FRAMarar verðum að gera betur í næsta heimaleik sem verður í “Úlfagrifjunni” í Úlfarsárdal.
Leikurinn í kvöld byrjaði vel, við virkuðum mjög sprækir og vou hreinlega miklu betri fyrstu 20 mín í leiknum.  Við náðum fljótlega að setja gott mark en þar var að verki Gunnar Helgi eftir vel útfærða aukaspynu og góðan skalla Tryggva.  Við vorum betri allan fyrri hálfleikinn og hefðum átt að fá vítaspyrnu á 24 mín þegar leikmaður Þróttar stöðvaði fyrirgjöf Orra með hendi. Við hleyftum Þrótturum aðeins inn í leikinn síðustu 15 mín hálfleiksins án þess þó að þeir næðu að setja einhverja pressu á okkur og leikurinn fjaraði dálítið út á þessum tíma.  Staðan í hálfleik 1-0. Við í ágætum málum og hefðu kannski átt nýta okkar færi betur.
Síðari hálfleikur var ekki eins spennandi, lítið að gerast fyrstu 15 mín hálfleiksins, við ekki að reyna mikið og náðum ekki nógu góðum tökum á leiknum.  Við héldum samt vel varnarlega og ekki í neinum vandræðum varnarlega. Við fengum tvö góð færi í síðari hálfleik sérstaklega fékk Orri gott færi þegar lítið var eftir.  Við kláruðum svo þennan leik vel, verðskuldaður sigur að mínu mati.  Við vorum heilt yfir betri í leiknum, vörnin átti góðan dag en hefðum átt nýta færin okkar betur.  Þessi leikur er eitthvað til að byggja á, formið á leikmönnum er að batna, við þurfum að lengja þann tíma sem við erum að spila á fullum krafti, þá eru okkur allir vegir færir. Vel gert FRAMarar.  Næsti leikur er útileikur gegn BÍ, sjáumst þá.
ÁFRAM FRAM