lilja bikarmót feb. 2021.

FRAMarar stóðu sig vel á bikarmóti um helgina

Fyrsta Bikarmót ársins í Taekwondo var haldið í herbúðum Ármanns um helgina. Mótið var jafnframt fyrsta Taekwondo mótið sem haldið hefur verið hérlendis í heilt ár og spennan því mikil.
Fram átti fimmtán keppendur á mótinu sem allir kepptu í tækni auk þess sem fjórir tóku einnig þátt í bardaga hlutanum þrátt fyrir takmarkaðar æfingar í vetur.

Í C flokki átti deildin fjóra keppendur í flokki barna og unnu bæði Wiktor og Lilja gull í sínum flokkum, Mabinty hlaut bronsveðlaun og var Nojus aðeins hársbreidd frá því að komast á verðlaunapall.
Í unglingaflokki hafnaði Eva okkar í þriðja sæti og Katri í því fjórða. Arnar Freyr keppti í grjóthörðum drengja flokki þar sem hann gerði sér lítið fyrir og nældi í þriðja sætið og bronsverðlaun.
Í fullorðins flokki hafnaði Jenný í öðru sæti og Flosi og Friðrik tóku gull og silfur í flokki karla. Þeir áttust einnig við í bardaga þar sem Friðrik hafði að lokum betur. Að auki vann Friðrik svo gull í flokki para með Jenný og stóð hann uppi sem stigahæsti Framarinn með 21 stig fyrir liðið.

Í B flokki var Patrik fyrstur á gólfið og var hann að keppa á sínu allra fyrsta móti. Þess má geta að B flokkur er sá flokkur þar sem einna mest brottfall er úr keppni vegna þess hve krefjandi hann er. Patrik fékk rautt belti fyrir um mánuði síðan og er því nýr í flokknum en ákvað samt að láta vaða út á keppnisgólfið og stóð hann sig með prýði og endaði aðeins 0,067 stigum frá verðlaunasæti. Munurinn verður varla minni.
Anna hafnaði í sjötta sæti í grjóthörðum unglinga flokki og Bjarki kláraði B flokkinn með öruggu silfri í flokki fullorðinna. Anna og Bjarki kepptu einnig í bardaga og hlutu bæði annað sætið og silfurverðlaun í sínum flokkum. Þess má geta að andstæðingur Bjarka í úrslitum er reyndur svartbeltingur í  landsliði Íslands og sýndi okkar maður gríðarlega baráttu frá upphafi til enda og stóð sig frábærlega.

Í A flokki hafnaði Rúdolf í þriðja sæti í sínum flokki og Hulda tók annað sætið í kvennaflokknum. Saman lönduðu þau svo gullverðlaunum í keppni para.

Eftir fyrsta bikarmót ársins er Fram í 5. sæti með 72 stig sem er frábær árangur og óskar deildin keppendum og aðstandendum innilega til hamingju með árangurinn og þakkar fyrir góða helgi.

Taekwondodeild Fram

Myndir: Tryggvi Rúnarsson 

Share this post

Share on facebook
Share on twitter
Share on linkedin
Share on pinterest
Share on email