Við ætlum að efna til skemmtilegs leiks í tilefni bikarúrslitanna á Laugardalsvelli í dag og nýta okkur tæknina til fullnustu. Á heimasíðu FRAM er Instagram-gluggi – gluggi sem birtir myndir sem teknar eru í gegnum þennan ágæta samfélagsmiðil og merktar eru “#framiceland”.
Við hvetjum FRAMara til sjávar og sveita – hvort sem þeir mæta í Laugardalinn í dag eða ekki – til að taka myndir sem tengjast FRAM á einn eða annan hátt og merka þær “#framiceland”. Hægt er að merkja myndir hvort heldur sem er þegar þær eru birtar eða með því að skrifa um þær ummæli eftir birtingu.
Myndirnar birtast eins og áður segir í Instagram-glugganum á heimasíðunni okkar, neytendum til gagns en einnig nokkurs gamans, og sérskipuð dómnefnd velur svo bestu myndina strax eftir helgi. Myndasmiðurinn verður leystur út með veglegum verðlaunum – fagurblárri og stórglæsilegri FRAM-treyju (keppnistreyju)!
Taka mynd – merkja hana “#framiceland” (annað hvort við birtingu eða í ummælum) – njóta dagsins!