OLÍS – deild kvenna aftur af stað, FRAM – Haukar á laugard.

Þá er keppni í OLÍS-deild kvenna loks að fara af stað aftur eftir langt hlé.  Síðustu leikir deildarinnar voru í lok nóvember s.l. og því í raun nýtt undirbúningstímabil sem hefur staðið síðan þá.  Þessi fyrsta umferð deildarinnar eftir hlé er einnig síðasta umferðinn í fyrri hluta OLÍS deildarinnar.  Línur eru því eitthvað farnar að skýrast um stöðu liðanna.
Í raun má segja að deildin sé nokkuð skipt.  Efst er Stjarnan og Valur fylgir þar fast á eftir.  Síðan koma, svolitið á eftir Grótta, ÍBV og FRAM og þar á eftir HK og FH.  Í neðri hlutanum eru síðan lið Hauka, Selfoss, Fylkis og KA/Þór.  Á botninum situr síðan lið Aftureldingar sem er enn án stiga í deildinni.

Mótherjar FRAM í leiknum á morgun, laugardaginn 11. janúar, eru Haukar sem eru í 8. sæti deildarinnar með 7 stig, á meðan FRAM er í 5. sæti deildarinnar með 14 stig.  Staða liðanna segir ekki allt, og ljóst að ef FRAM kemur ekki allt vel undirbúið til leiks og tilbúið í mikla baráttu mun leikurinn á morgun verða mjög erfiður.

 Á síðustu þremur keppnistímabilum hafa liðin leikið 7 leiki eins og fram kemur hér að neðan. 

FRAM hefur sigrað í öllum þessum leikjum og skorað alls 235 mörk í þeim eða 33,57 mörk að meðaltali í leik.  Haukar hafa hins vegar skorað 136 mörk í þessum leikjum eða 19,43 mörk að meðaltali í leik.

Eins og áður sagði þá mætti samkvæmt þessu gera ráð fyrir sigri FRAM í leiknum á morgun.  Haukaliðið hefur hins vegar tekið miklum framförum undanfarin ár.  Þar hefur farið fremst í flokki Marija Gedroit sem er ein besta skytta deildarinnar í dag og hefur skorað um þriðjung marka Hauka í vetur.

Það er því ljóst að FRAM verður að eiga góðan leik á morgun til að sigra og þarf á góðum stuðningi að halda. Þínum stuðningi.

Er ekki tilvalið að mæta á leik í OLÍS-deild kvenna til að hita sig upp fyrir fyrsta leik Íslands á EM sem fram fer á sunnudaginn.

gþj