Haraldur Þorvarðarson hefur verið ráðinn þjálfari meistaraflokks kvenna hjá Fram og mun stýra liðinu á næsta keppnistímabili.
Haraldur hefur verið aðstoðarþjálfari meistaraflokks karla síðastliðin fjögur ár. Samhliða því hefur hann stýrt U-liði og 3. flokk karla hjá Fram og stýrði U-liði félagsins til sigurs í Grill 66-deildinni í fyrravor. Hann er einn af reynslumestu þjálfurum hjá Fram og hefur áður stýrt fjölmörgum yngri flokkum hjá bæði karla- og kvennaliðum félagsins, verið yfirþjálfari yngri flokka og átt stóran þátt í þeirri öflugu uppbyggingu sem hefur átt sér stað í handknattleiksdeild félagsins.
Sjálfur á Haraldur að baki farsælan feril sem leikmaður hjá Fram auk þess sem hann spilaði í Þýskalandi um skeið.
Arnar Pétursson og Roland Eradze munu einnig vera í þjálfarateymi meistaraflokks kvenna fyrir næsta tímabil.
Jafnframt þökkum við Rakel Dögg Bragadóttur fyrir gott starf í þágu félagsins og óskum henni alls hins besta í framtíðinni.
