FRAM tekur á móti Þór á sunnudag

FRAM og Þór mætast í sjöundu umferð Pepsideildar karla í knattspyrnu á Laugardalsvelli á sunnudag, 16.júní, og verður flautað til leiks klukkan 17. Þórsarar sóttu þrjú stig í Dalinn í siðustu heimsókn sinni þangað og FRAM hefur ekki fagnað sigri gegn þeim á heimavelli í sjö ár.

FRAM situr í sjöunda Pepsideildarinnar með átta stig að sex umferðum afloknum og Þórsarar eru í næsta sæti fyrir neðan, því áttunda, með sex stig.  Stigin sín hafa FRAMarar sótt til Víkinga, Keflvíkinga, Valsmanna og Fylkismanna, en tapleikirnir tveir eru gegn ÍA og Stjörnunni.  Þórsarar hafa tekið stig af Víkingum og Fylkismönnum, en þeir hafa tapað fyrir Breiðabliki, FH, KR og Val.
Hólmbert Aron Friðjónsson og Steven Lennon hafa skorað sín hvor tvö mörkin fyrir FRAM í deildinni, en Chukwudi Chijindu er markahæstur Þórsara með þrjú mörk.

Liðin mættust síðast í deildinni fyrir tveimur árum og þá fögnuðu Þórsarar sigri í báðum leikjum; 3-0 á Akureyri og 1-0 í Laugardalnum.  Janez Vrenko skoraði sigurmarkið í þeim leik.
FRAM og Þór mættust í tvígang í 1.deildinni sumarið 2006 og skiptu þá stigunum bróðurlega á milli sín.  Þórsarar unnu 1-0 á Akureyri, en FRAM vann í Laugardalnum 4-0.  Jónas Grani Garðarsson skoraði þrennu í þeim leik, Helgi Sigurðsson skoraði fjórða markið og er því síðasti FRAMarinn sem skorað hefur gegn Þór á heimavelli.

Búast má við hörkuleik í Laugardalnum á sunnudag og eru stuðningsmenn FRAM hvattir til að mæta og styðja þá bláu af lífi og sál.