Meistaraflokkur kvenna tók á móti liði Selfoss í leik á laugardaginn í OLÍS deildinni. Þetta var seinni leikur liðanna í vetur. Þann fyrri sem fór fram í nóvember s.l. sigraði FRAM með einu marki 22 – 21 eftir að hafa verið undir nánast allan leikinn.
Leikurinn byrjaði fjörlega og liðin skiptust á að skora. Selfoss hafði yfirhöndina fyrstu mínúturnar en síðan náði FRAM frumkvæðinu. Það var þó jafnræði með liðunnum og staðan jöfn í hálfleik 12 – 12.
Seinni hálfleikur byrjaði svipað og sá fyrri hafði verið. FRAM var þó með forystu 16 – 14 þegar 10 mínútur voru liðnar af hálfleiknum. Þá skellti hins vegar FRAM vörnin í lás. Selfoss skoraði ekki nema eitt mark það sem eftir lifði leiks meðan FRAM skoraði ein 12 mörk. Lokatölur urðu því 28 – 15, öruggur sigur FRAM eftir jafnan leik í 40 mínútur.
Sóknin hjá FRAM gekk þokkalega lengst af leiknum. Vörnin var alveg í lagi fyrstu 40 mínúturnar en eftir það varð hún frábær og fékk ekki nema 1 mark á sig í 20 mínútur. Í kjölfar góðrar varnar skoraði FRAM ein 14 mörk úr hraðaupphlaupum í leiknum, og þar fóru hornamennirnir Marthe og Hekla fremstar í flokki.
Sunneva stóð í markinu í 57 mínútur og varði 14 skot. Hafdís Lilja kom inná undir lokin til að verja víti og gerði það. Hún var síðan í markinu til loka leiks og fékk ekki á sig mark.
FRAM sýndi í seinni hálfleiknum hvers það er megnugt í vörn þegar hún smellur saman. Í heild ágætisleikur og heldur FRAM áfram í keppninni um eitt af fjórum efstu sætum deildarinnar.
Mörk FRAM skoruðu: Marthe 9, Ragnheiður 7, Hekla Rún 5, Sigurbjörg 3, Hafdís 2, Elva Þóra 1 og Kristín 1.
ÁFRAM FRAM