fram-Stjarnan

Tap gegn sterku liði í Lengjubikar karla

fram-StjarnanStrákarnir okkar í fótboltanum hófu í kvöld leik í Lengjubikarnum þegar þeir mættu Stjörnunni í Egilshöll.  Það var vel mætt á leikinn og greinilegt að áhugi FRAMarar er að aukast.  Liðið lék æfingaleik gegn B68 frá Færeyjum á föstudagskvöld en sá leikur endaði með skiptum hlut 1-1.  Við skoruðum á undan með marki frá Kristófer Reyes og voru yfir þar til á loka mín. leiksins þegar gestirnir skoruðu og jöfnuðu leikinn.  Ágætlega mætt á þann leik sem var í Úlfarsárdal og menn höfðu það á orði að þetta væri fyrsti Evrópuleikur FRAM í Úlfarsárdal. Þeir verða fleiri í dalnum, munið mig um það.
Leikurinn í kvöld var ekki okkar leikur, við byrjuðum illa, bárum mikla virðingu fyrir andstæðingunum og sáum ekki alveg til sólar í fyrri hálfleik.  Staðan eftir 17 mín. var 0-2, fyrra markið var dálítð klúður og kom strax á 11 mín.  það seinna á 17 mín. gott mark og lítið við því að segja.  Eins og áður sagði þá náðum við lítið að halda boltanum og byggja upp okkar leik, þurfum að læra að leika á móti svona öflugu liðum og hafa trú á okkar liði. Staðan í hálfleik óbreytt 0-2.  Ljóst að við yrðum að gera mun betur ef ekki ætti illa að fara.
Eitthvað hefur Ási blásið lífi í okkar menn í síðari hálfleik þó við næðum ekki að skora en við bættum okkar leik þegar á hálfleikinn leið. Fengum á okkur mark á 75 mín. staðan 0-3. Við náðum aðeins að  ógna marki andstæðingana eftir markið og aukið líf í okkar mönnum. Það dugði bara ekki í kvöld, mættum sterku liði sem við vorum ekki tilbúnir að mæta, niðurstaðan, 0-3 tap.  Lítið við þessu að gera en ljóst að við þurfum að girða okkur í brók, við getum alveg bitið betur frá okkur og eigum að hafa meiri trú á eigin getu.  Diddi var flottur í markinu, var okkar besti maður en allir geta gert betur.  Mótið er rétt að byrja og ekki ástæða til að örvænta en þurfum að mæta grimmari og með hausinn uppi í  næsta leik.
Næsti leikur er á laugardag í Úlfarsárdal en þá ætlum við að leika æfingaleik gegn ÍA kl. 12:00, endilega kíkið á þann leik.

ÁFRAM FRAM

Share this post

Share on facebook
Share on twitter
Share on linkedin
Share on pinterest
Share on email