Lennon640

Valur og FRAM mætast á Vodafonevellinum í kvöld

LennonHeil umferð er á dagskrá Pepsideildar karla í knattspyrnu í kvöld og bláklæddra Safamýrarsveina bíður það verðuga verkefni að heimsækja nágranna sína á Hlíðarenda.  Valsmenn hafa unnið báða leiki sína í Pepsideildinni til þessa, gegn Fylki og ÍA á meðan FRAMarar hafa unnið Víking í Ólafsvík og gert jafntefli við Fylki.

Leikir FRAM og Vals skapa sérstakan sess í hugum stuðningsmanna, enda eiga þeir sér langa og merka sögu þar sem nágrannarígurinn svífur yfir vötnum.  Liðin hafa undanfarin fimm ár komið sér upp þeirri merkilegu hefð, með einni undantekningu, að vinna deildarleikina til skiptis.  Þetta mynstur má rekja aftur til ársins 2008, en þá unnu Valsmenn 2-0 á Vodafonevellinum og FRAM svaraði með sigri í Laugardalnum 2-1.  Sumarið 2009 snéris dæmið við; Valur vann 2-1 á Laugardalsvelli og FRAM svaraði með því að vinna að Hlíðarenda, 2-1.  Sumarið 2010 kemur eina frávikið frá þessari „hefð“, en þá gerðu liðin jafntefli á Laugardalsvelli 2-2 og FRAM vann á Vodafonevellinum 3-1.  Sumarið 2011 fögnuðu Valsmenn sigri á heimavelli 1-0 og FRAM hafði betur í Laugardalnum 3-1 og á síðustu leiktíð unnu liðin útileikina á víxl; Valur vann í Laugardalnum 1-0 og FRAM vann að Hlíðarenda 2-0.
Síðasta viðureign þessara liða er þó rimma þeirra í Lengjubikarkeppninni á vormánuðum, en þar fögnuðu Valsmenn öruggum sigri, 4-1.

Flautað verður til leiks á Vodafonevellinum klukkan 19.15 í kvöld og eru stuðningsmenn FRAM hvattir til að fjölmenna og láta hraustlega til sín taka.

Þriðja umferð Pepsideildar karla, fimmtudaginn 16.maí:
Kl. 18.00  KR – Þór
Kl. 19.15  Fylkir – Stjarnan
Kl. 19.15  Breiðablik – ÍA
Kl. 19.15  Valur – FRAM
Kl. 19.15  Víkingur Ó. – Keflavík
Kl. 20.00  FH – ÍBV

Share this post

Share on facebook
Share on twitter
Share on linkedin
Share on pinterest
Share on email